नामची । भारतको सिक्किमस्थित नामची जिल्लाको समरडुङमा भीषण वर्षासँगै गएको पहिरोले टिस्टा जलविद्युत् आयोजनाको निर्माणाधीन सुरुङ पुरिँदा कम्तीमा ८ जनाको मृत्यु भएको छ। दुर्घटनामा परेका अन्य १९ जना मानिसहरू सुरुङभित्रै थुनिएको आशङ्का गरिएको छ । प्रहरी उपरीक्षक सोनाम डोमा भोटियाले भनेका छन्, ‘हामीले ८ वटा शव निकालेका छौँ र १९ जना अझै सुरुङभित्र थुनिएको आशङ्का छ ।’ उद्धार कार्य रातभर जारी रहे पनि मंगलबार बिहानै मात्र शवहरू निकाल्न सकिएको उनले बताए। लगातारको वर्षाका कारण उद्धार कार्यमा बाधा पुगिरहेको छ। खराब मौसम र कठिन भूभागका कारण सुरुमा गरिएका तीनवटा उद्धार प्रयासहरू असफल भएका थिए ।
सिक्किमका मुख्यमन्त्री प्रेमसिंह तामाङ-गोलेले जिल्ला प्रशासन, प्रहरी, राज्य आपत्कालीन प्रतिक्रिया बल, अग्निनियन्त्रक सेवा र राष्ट्रिय आपत्कालीन प्रतिक्रिया बलको टोली घटनास्थलमा खटिएको बताएका छन् । उनले उद्धार कार्यको नजिकबाट अनुगमन गरिरहेको जानकारी दिए । सुरुङभित्र कम्तीमा ३ किलोमिटर मिटर गहिराइमा मजदुरहरू थुनिएकाले उद्धारमा कठिनाइ भइरहेको छ । जिल्ला अधिकारी अनुपा ताम्लिङका अनुसार पहिरो जाँदा निजी कम्पनीका १९ जना र एनएचपीसीका ६ जना मजदुर घटनास्थलमा थिए। पहिलो पटक उद्धारका लागि गएका तीन जना मजदुरमध्ये दुई जना बाहिर निस्कन सकेनन्। यो सुरुङ एनएचपीसीको टिस्टा स्टेज ६ जलविद्युत् आयोजनाको एक भाग हो । मुख्यमन्त्री गोलेले घटनाप्रति गहिरो दुःख व्यक्त गर्दै मृतकका परिवारजनप्रति समवेदना प्रकट गरेका छन् । उम्मेदवार तथा बाँकी मजदुरहरूको उद्धारका लागि सबै संयन्त्र र टोलीहरू निरन्तर खटिरहेको उनले सामाजिक सञ्जालमार्फत जानकारी गराएका छन् ।