इलाम । जिल्ला प्रहरी कार्यालय इलामले असोज महिनामा भएका तीन गम्भीर घटनाको अनुसन्धानका क्रममा गाँजा तस्करी, हत्या र लुटपाटका आरोपितलाई पक्राउ गरिएको जनाएको छ। पक्राउ परेकामाथि म्याद थप गरी थप अनुसन्धान भइरहेको प्रहरीले जनाएको छ।
गत असोज ६ गते इलाम नगरपालिका–९ भञ्ज्याङस्थित मेची राजमार्गमा चेकजाँचका क्रममा ना.४ ख. ८९९६ नम्बरको ट्रकबाट लुकाएर राखिएको १ हजार ५०४ किलो ६१० ग्राम गाँजा बरामद भएको थियो। फरार ट्रक चालक धनकुटा सहिदभूमि गाउँपालिका–६ का २४ वर्षीय महेश परियारलाई प्रहरीले भोजपुरको आमचोक गाउँपालिका–८ बाट कात्तिक २३ गते पक्राउ गरेको छ। बरामद गाँजा असोज २० गते माईजोगमाई गाउँपालिका–४ माईबेनी खोलामा नष्ट गरिएको थियो।
त्यस्तै, असोज २१ गते इलाम नगरपालिका–१२ बान्द्रेमा ६६ वर्षीया जितमती लिम्बु मृत फेला परेकी थिइन्। अनुसन्धानका क्रममा घटनामा संलग्न रहेको आरोपमा इलाम नगरपालिका–११ का ३२ वर्षीय त्रिभुवन भुजेललाई प्रहरीले कात्तिक २० गते सूर्योदय नगरपालिका–२ फाटक क्षेत्रबाट पक्राउ गरेको जनाएको छ। मृतकको कानमा चोट देखिएको र सुनको माडवारी तथा मोबाइल हराएको प्रहरीले उल्लेख गरेको छ।
असोज २७ गते माङसेबुङ गाउँपालिका–२ याङरुपेमा ६९ वर्षीया सन्चरानी लिम्बुमाथि कुटपिट गरी गम्भीर घाइते बनाउँदै सुनका गरगहना र नगद चोरी गरिएको घटनामा माङसेबुङ–२ का ४१ वर्षीय जयमान राई पक्राउ परेका छन्। उनको घरबाट केही गरगहना र बिक्रीबाट प्राप्त १ लाख २३ हजार ५०० रुपैयाँ बरामद भएको प्रहरीले जनाएको छ। चोरीको सुन खरिद गरी स्वरूप परिवर्तन गरेको आरोपमा झापाको दमक–६ स्थित सुविक ज्वेलर्सका सञ्चालक ३५ वर्षीय विक्रम विश्वकर्मा पनि पक्राउ परेका छन्। उनीबाट ३.८१० ग्राम सुन बरामद भएको प्रहरीले जनाएको छ।
तीनै घटनाका आरोपितमाथि म्याद थप गरी कानुनी प्रक्रिया अघि बढाइएको जिल्ला प्रहरी कार्यालय इलामले जनाएको छ।