इलाम, २६ जेठ ः कोरोना भाईरसको कारण देशभर लागु भएको लकडाउन नेपाल सरकारले आगामी जेठ ३२ गते सम्म लागु गरेको छ । तर यसै बिच लकडाउनलाई केही खुकुलो बनाएर जाने विषयमा पनि धेरै बहसहरु भए । तर इलाम सदरमुकाममा भने लकडाउनको विषयमा इलाम प्रशासन र इलाम उद्योग वाणिज्य संघले गरेको निणर्यलाई धेरै स्थानीयबासीहरुले नौटंकीको संज्ञा दिएका छन् । इलाम उद्योग वाणिज्य संघले केही दिन अघि विज्ञप्ती जारी गरेर हरेक दिन बिहान ७ बजेदेखि १ बजेसम्म व्यापार व्यवसाय संचालन गर्न सकिने जनायो । यसकै बाबजुद आईतबार इलाम बजार तराईको सिद्रा बजार भन्दा बढी चहलपहल थियो । र यो आज सोमबार पनि व्यवसायीहरुले निर्वाध रुपमा आफ्नो व्यापार व्यवसायहरु संचालन गरिरहेका छन् ।
तर आजै सोमबार बिहानैदेखि इलाम बजारको केही सिमित क्षेत्रमा इलाम प्रशासनको हवला दिदै नेपाल प्रहरी र ट्राफिक प्रहरीहरु यातायातका साधनहरु चल्न दिईरहेका छैनन् । आईतबार मात्रै निर्वाध रुपमा चलेका सवारी साधन कुनै सुचनै बिना एक्कासी रोकिन पुग्दा सर्वसाधारणहरु मारमा परेका छन् । इलामको चोकबजारमा मात्र इलाम प्रशासनको निणर्य लागु भएको सर्वसाधारणहरुको भनाई रहेको छ । त्यस क्षेत्रदेखि बाहेका क्षेत्रमा भने निर्वाध रुपमा सम्पूर्ण सवारी साधनहरु चलिरहेका छन् । इलाम वाणिज्य संघको आग्रहमा खुलेका व्यवसायमा खरिद बिक्री गर्न जानेहरुलाई प्रहरीहरुले रोक्ने कार्य गरिरहेका छन् । त्यसैले यस विषयमा यो इलाम प्रशासन र वाणिज्य संघको नौटंकी प्रर्दशन गरेको मर्कामा परेका बासिन्दाहरुको भनाई रहेको छ । स्मरण रहोस नेपालको ७७ जिल्ला मध्ये कोरोना भाईरसबाट संक्रमित नभएको ७ जिल्लाहरु मध्ये इलाम पनि पर्दछ । (हेर्नुस् केही तस्बीरहरु)
