दोश्रो एनआरएनए इलाम गोल्डकप मंसिर २२ देखि

१० मंसिर इलाम । एनआरएनए इलाम गोल्डकपको दोश्रो संस्करण आगामी मंसिर २२ गतेदेखि सञ्चालन हुने भएको छ । आयोजक रेडहर्स फुटवल क्लब इलामले आज पत्रकार सम्मेलन गरि प्रतियोगिताको जानकारी गराएको हो ।
गतबर्षदेखि शुरु भएको एनआरएनए इलाम गोल्डकप प्रतियोगिताको दोश्रो संस्करण मंसिर २२ देखि २९ गतेसम्म सञ्चालन हुनेछ । प्रतियोगितामा संकटा, त्रिभुवन आर्मी, चर्च बोइज युनाइटेड, एनआरटी, जिटिए दार्जिलिङ, रेडस्टार झापा, मच्छिन्द्र र आयोजक रेडहर्सले प्रतिस्पर्धा गर्ने आयोजक संस्थाका सदस्य निरोज खड्गीले जानकारी दिए । प्रतियोगिताको बिजेताले १० लाख रुपैयाँ र उपबिजेताले ५ लाख रुपैयाँ पुरस्कार पाउने खड्गीले बताए । प्रतियोगिताका लागि इलाम नगरपालिकाले १० लाख रुपैयाँ प्रदान गरेको छ भने तारा रोजु सापकोटा च्यारिटेवल ट्रष्टले दोश्रो पुरस्कारका लागि रु ५ लाख उपलब्ध गराएका छन् ।
प्रतियोगिता सम्पन्न गर्दासम्म कुल ९० लाख खर्च हुने आयोजकले अनुमानित बजेट बनाएको संस्थाका सचिव प्रकाश घिमिरेले बताए । उनले भने, ‘गतबर्ष भन्दा पुरस्कार नै दोब्बर बनाईनु, महंगी बढ्नु तथा खेलमैदान स्तरीकरण गर्न ठूलो खर्च हुनुले यस बर्षको कुल खर्च अत्याधिक बृद्धि हुने देखिन्छ ।’ सर्वाधिक गोलकर्ता, उत्कृष्ट खेलाडी, उत्कृष्ट किपर, उत्कृष्ट मिडफिल्डर, उत्कृष्ट डिफेन्डर, उदीयमान खेलाडी र उत्कृष्ट कोचलाई नगद रु ११ हजार रुपैयाँले पुरस्कृत गरिने तथा म्यान अफ द म्याचलाई रु ७ हजार पाँचसय रुपैयाँले पुरस्कृत गरिने रेडहर्सका सचिव घिमिरेले जानकारी दिए ।
पत्रकार सम्मेलन विच आयोजक संस्था रेडहर्स फुटबल क्लबका अध्यक्ष सांगे येल्मुले ‘इलाम गोल्डकप स्पोर्ट्स जर्नालिजम अवार्ड’को घोषणा गरे । इलामको खेलक्षेत्रमा योगदान पु¥याउने सञ्चारकर्मीलाई सो अवार्ड प्रदान गरिने आयोजकले बताएको छ ।
पहिलो संस्करणको उपाधि न्युरोड टिम एनआरटीले जितेको थियो । विजेताले नगद ५ लाख र उपविजेता विर्तामोड युनाइटेडले ३ लाख नगद पुरस्कार प्राप्त गरेको थियो ।