इलाम, ५ मंसिरः सवारीचालक अनुमतिपत्र ९लाइसेन्स० को अनलाइन आवेदन प्रणालीबाट अब एकजनाले एउटा मात्रै फारम भर्न मिल्ने व्यवस्था यातायात व्यवस्था विभागले गर्न लागेको छ। अनलाइन आवेदनमा दुरुपयोग भएको भन्दै विभागले अब एकजनाले एउटा मात्र फारम भर्न पाउने गरी सिस्टम विकास गर्न लागिएको विभागले जनाएको छ। सहजरूपमा अनलाइन आवेदन भर्न नपाएको भन्दै सेवाग्राहीको गुनासो बढेपछि विभागले आफ्नो मात्रै अनलाइन फाराम भर्न पाउने व्यवस्था गर्न लागेको हो। विभागका एक अधिकारीका अनुसार, अनलाइन आवेदन दिन पैसा तिर्नु परेको गुनासोहरु धेरै आउने गरेका छन्।यसबाहेक एकै व्यक्तिले धेरै पटक भरेको र हुन्छ कि हुँदैन भनेर धेरैवटा कार्यालयहरुमा प्रयास गरेका कारण पनि समस्या भएको भनाइ विभागको छ। ‘पहिले एकैजना व्यक्तिको नाममा जतिवटा फाराम भरे पनि प्रणालीले लिन्थ्यो। अहिले त्यो हटायौं तर अझै पनि धेरै समस्या छन्,’ उनले भने, ‘अब युजर नेम र पासवर्डसहितको अकाउन्ट बनाएपछि मात्रै फाराम भर्न मिल्ने गरी सिस्टम विकास गर्न लागेका छौं। त्यसपछि धेरै समस्या समाधान हुन्छन्।’
सवारीचालक अनुमतिपत्रको विद्युतीय प्रणालीको सफ्टवेयर भारतीय कम्पनीले बनाएको हो। यो बनेर कार्यान्वयमा आएको ६ वर्ष बितिसकेको छ। त्यसका बाबजुद उक्त कम्पनीले नेपाललाई हस्तान्तरण भने गरिसकेको छैन। सिस्टम हस्तान्तरण गर्ने तयारी भइरहेको पनि विभागका तीन इन्जिनियरको भनाइ छ। ‘उसले सिस्टम दिन्छ। त्यसपछि हामी त्यसमा केही सुधार गर्छौ’, उनले भने। अहिले दिउँसो लोड बढी भएको भन्दै विभागले बिहान १० बजेदेखि बेलुका ५ बजेसम्म अनलाइन आवेदन प्रणाली बन्द हुन्छ। कर्मचारीले काम गर्ने प्रणाली र अनलाइन प्रणाली एउटै भएका कारण कार्यालय समयमा यो संचालन गर्दा चाप भएर सिस्टममा नै समस्या आउन थालेपछि रोकिएको हो। करिब ६ महिना रोकेर कात्तिक ८ गते संचालनमा ल्याएको प्रणालीमा करिब ६ लाखले आवेदन दिएको विभागले जनाएको छ। सीमित ट्रायल सेन्टर रहेका कारण अहिले अनलाइन आवेदन दिए पनि ट्रायलका लागि १८ महिनासम्म कुर्नुपर्ने बाध्यात्मक अवस्था छ।
