१८ चैत, इलाम : इलामको वायु प्रदुषणको लेभल बृद्धि भई ओरेन्ज जोनमा प्रवेश गरेको छ । विश्वभरको वायु प्रदुषण मापन गर्ने अक्कुवेदर र ब्रिजोमिटरका अनुसार आज विहान ६ बजेको समयमा इलामको एक्युआई (एयर क्वालिटी इन्डेक्स) ११० पुगेको छ भने समग्र मेची राजमार्गको एक्युआई २०७ पुगेको छ । यस्तो अवस्थामा संवेदनशील समुहमा पर्ने मानिसहरु घरबाहिर ननिस्कन अक्कुवेदरले आग्रह गरेको छ । नेपालस्थिति अमेरीकी राजदुतावासले एक्युआई १०१ देखि माथि भएको अवस्थामा वालकालिका, बृद्ध, मुटुरोगी, फोक्सो रोगी तथा दमरोगीहरुलाई घरबाहिर ननिस्कन र घरबाहिर गरिने सबैखाले गतिविधि बन्द गर्न अनुरोध गरेको छ ।
के हो एक्युआई ?
यसको पूरा रूप हवाई गुणस्तर सूचक हो । यो हावामा प्रदूषण मापन गर्ने सूचक हो । छुट्टाछुट्टै देशले आफ्नो मुलुकको हावाको गुणस्तर मापनको लागि आफ्नै एउटा सूचक बनाएका हुन्छन् । एक्युआईको प्रयोग अमेरिकाले गर्दै आएको छ । यो सूचकको मान धेरै भए त्यो क्षेत्र बढी प्रदूषित र कम भए कम प्रदूषित भन्ने बुझिन्छ । एक्युआईको मान शून्य देखि ५० को बीचमा भए त्यो क्षेत्र बस्नको लागि स्वास्थ्यको हिसाबले उचित मानिन्छ ।
ग्रीन जोनमा ० देखि ५० एक्युआई हुन्छ । यल्लो जोनमा ५० देखि १०० को बीचको एक्युआई हुन्छ । यस्तो स्थान बस्नको लागि ठिकै मानिन्छ । ओरेञ्ज जोनमा १०१ देखि १५० को बिचको एक्युआई हुन्छ । यस्तो सम्मको मान केही संवेदनशील समूहका लागि अस्वस्थकर मानिन्छ । रेड जोनमा १५१ देखि २०० विचको एक्युआईलाई मानिन्छ । यस्तो स्थानलाई अस्वस्थकर मानिन्छ । ३०० सम्म धेरै नै अस्वस्थकर र त्यसभन्दा बढी ५०० को मान भएको स्थानमा बस्न सकिँदैन ।
