इलाम, १० जेठ । कोशी प्रदेश पशुपन्छी तथा मत्स्य विकास निर्देशनालय तथा भेटेरिनरी अस्पताल एवं पशु सेवा विज्ञ केन्द्र इलामको आयोजनामा आइतबार इलाममा खोरेत रोग नियन्त्रण आयोजना सम्बन्धी योजना तर्जुमा गोष्ठी सम्पन्न भएको छ ।
गोष्ठीमा इलाम जिल्लाका १० वटै स्थानीय तहका प्रमुख तथा उपप्रमुखहरुले आफ्नो पालिकामा खोरेत रोग नियन्त्रणका लागि भइरहेका गतिविधिबारे जानकारी गराएका थिए । कार्यक्रममा सहभागीहरुले इलाम भारतसँग सिमाना जोडिएको जिल्ला भएकाले चौपायाको ओसारपसारका कारण रोग नियन्त्रण चुनौतीपूर्ण बन्दै गएको बताएका थिए ।
उनीहरुले खोरेत रोगविरुद्धको खोप अभियान प्रभावकारी बनाउन कृषकहरुलाई थप सचेत बनाउनुपर्ने आवश्यकता औंल्याएका थिए । साथै खोप लगाउने प्राविधिकहरुलाई उपलब्ध गराइने सेवा सुविधा तथा रकम न्यून रहेको भन्दै त्यसतर्फ ध्यान दिन आग्रह गरेका थिए । गोष्ठीमा आगामी आर्थिक वर्षमा खोरेत रोग नियन्त्रणका लागि स्थानीय तहहरुले आवश्यक बजेट विनियोजन गर्नुपर्ने विषयमा समेत छलफल भएको थियो । कार्यक्रममा कोशी प्रदेश सरकारका उद्योग, कृषि तथा सहकारी मन्त्री ईस्राइल मन्सुरी को उपस्थिति रहेको थियो ।
