पुस २२, इलाम : प्रभु बैंक इलामले इलाम अस्पताललाई ५ लाख रुपैयाँ सहयोग गरेको छ । अस्पतालमा प्रयोग हुने पिउने पानीलाई शुद्धिकरण गर्ने अत्याधुनिक प्रविधि एरोप्लाण्ट जडान गरि प्रयोगमा ल्याउनका लागि बैंकले सो सहयोग गरेको हो । इलाम अस्पतालको प्रशाशनिक भवनमा आइतबार आयोजित एक एक समारोहका बीच प्रभु बैंक ईलाम शाखा कार्यालयका शाखा प्रबन्धक रोशन संग्रौलाले ईलाम जिल्ला अस्पताल ईलामका मेडिकल सुपरिटेन्डेन्ट डा. प्रभु शाहलाई पाँच लाख रुपैयाँको चेक हस्तान्तरण गरे ।
उक्त कार्यक्रममा ईलाम नगरपालिका वडा नं. ८ का वडाध्यक्ष होमबहादुर बस्नेत, ईलाम नगरपालिका वडा नं.७ का महिला सदस्य ईन्दिरा राई, इलाम उद्योग बाणिज्य संघका उपाध्यक्ष दिपेश श्रेष्ठ, समाजसेवी श्री हिमाल कर्मचार्य र समाजसेवी रतन कुमार चौधरी लगायत अस्पतालका कर्मचारी एवं सेवाग्राहीहरु समेतको उपस्थिति रहेको थियो । अस्पतालमा जडान हुने एरोप्लाण्टबाट अस्पतलामा व्यवस्थित रुपमा सफा खानेपानी वितरण भई अस्पतालमा आउने बिरामी तथा सेवाग्राहीहरुले सफा खानेपानी प्रयोग गर्न पाउने विश्वास लिएको बैकले जनाएको छ । विगतका बर्षहरुमा समेत बैंकले संस्थागत सामाजिक उत्तरदायित्व कार्यक्रम अन्तर्गत इलामको सामाजिक क्षेत्रमा विभिन्न समयमा सहयोग गर्दै आएको छ ।
