इलाम, २ फागुनः रुस युक्रेन युद्धमा मारिएका इलामका गंगाराज मोक्तानको परिवारलाई राहत दिन रुस तयार भएको छ । नेपाली दुताबासमार्फत क्षतिपूर्ति पठाइदिने नेपाल सरकारको प्रस्तावमा रुस तयार भएको परराष्ट्र मन्त्रालयका प्रवक्ता अमृतबहादुर राईले अनलाईनबखरलाई बताएका छन् । प्रवक्ता राईका अनुुसार रुसी सरकारले मस्कोस्थित नेपाली दूतावासलाई राहत रकम उपलब्ध गराउने भनेको छ । उक्त रकम परराष्ट्र मन्त्रालयमार्फत नेपाल ल्याइनेछ । त्यसपछि जिल्ला प्रशासन कार्यालय इलाम मार्फत सम्बन्धित परिवारलाई राहत रकम दिने उनले जानकारी दिए । रुसको सेनामा भर्ती भई मृत्युवरण गरेका सबैको परिवारलाई क्षतिपुर्ति दिनेगरि रुस तयार भएको हो । स्रोतका अनुसार मृतकको परिवारले बीमा र राहतबापत १ करोड ५० लाख रुपैयाँ पाउन सक्छन् । तर मृतकको बीमा छैन भने प्रत्येक परिवारले लगभग ७३ लाख रुपैयाँ पाउन सक्छन् । यद्यपि, राहत रकम कति हुने भन्ने टुंगो नभएको परराष्ट्र मन्त्रालयको भनाइ छ । परराष्ट्र मन्त्रालयको कन्सुलर विभागमा अहिलेसम्म रुसी सेनामा भर्ती भएका १५० जनाको परिवारले सुरक्षित स्वदेश फिर्ताको लागि निवेदन दिएका छन् । रुसी फौजमा भर्ना भएक ६ जना भन्दा बढी युक्रेनको कब्जामा छन् । इलाम ९ भञ्ज्याङ सुकिलुम्बा एयरपोर्ट छेउ घर भएका मोक्तानको कात्तिक २९ गते भाइटीकाको दिन युद्धका क्रममा मृत्यु भएको थियो ।
