इलाम, १६ कार्तिकः नेपाली राष्ट्रिय महिला फुटबल टोलीकी कप्तान तथा गोलकिपर एन्जिला तुम्बाफो सुब्बाको जीवनमा आधारित फिल्म ‘अञ्जिला’को छायांकन शुरु भएको छ । एन्जिलाको जीवनमा आधारित फिल्म ‘अञ्जिला’ को छायांकन उनकै जन्मस्थान इलामको आइतबारेमा सोमबारबाट शुरु भएको हो । मिलन चाम्सको निर्देशन रहेको फिल्मको मुख्य निर्माताको रुपमा सशस्त्र प्रहरी बल एपीएफका पूर्व एसपी प्रेमकुमार श्रेष्ठ तथा अन्य निर्मातामा विनोद अग्रवाल र राजेश बगडिया रहेका छन् ।
फिल्ममा ‘अञ्जिला’ पात्रको भूमिका एन्जिला आफैले निभाउँदै छिन् । यसका लागि उनले अभिनेत्री सिर्जना सुब्बासँग चार महिना अभिनय तालिम समेत लिएकी थिइन्। एन्जिलाको मुख्य भुमिका रहेको फिल्ममा दयाहाङ राई, बुद्धि तामाङ, मिरुना मगर, सिर्जना सुब्बा, माओत्से गुरुङ, विजय बराल, हरि खड्का, बेदना राई र परिक्षा लिम्बुको पनि अभिनय रहेको छ।
निर्देशक चाम्सका अनुसार सोमबार माओत्से र सिर्जनाको दृश्यसँगै छायांकन शुरु भएको छ भने दयाहाङ र मिरुनाले मंगलबारदेखि छायांकन थाल्ने छन् । त्यस्तै एन्जिलाले तीन-चार दिनपछि छायांकन थाल्नेछिन् ।
फिल्मलाई इलाम, झापा र काठमाडौंमा खिच्ने तयारी छ भने इलाममा २६ दिन तथा काठमाडौंमा १९ दिनको छायांकन तालिका रहेको छ । फिल्ममा एन्जिलाको बाल्यकालदेखि राष्ट्रिय खेलाडी बन्दासम्मको संघर्ष र यात्रा प्रस्तुत गरिनेछ । मुनलभ इन्टरटेनमेन्टको ब्यानरमा बन्ने फिल्मलाई आगामी चैत वा वैशाखमा रिलिज गर्ने योजना रहेको छ ।
