इलाम, २५ जेठः आज मंगलबारबाट देशभरका सबै जिल्ला सहित इलाममा पनि विभिन्न उमेर समूहका जेष्ठ नागरिकहरुलाई कोरोना विरुद्धको “भेरोसेल” खोप लगाउन थालिएको छ । स्वास्थ्य कार्यालय इलामले इलाम सदरमुकाममा मंगलबार बिहान संचारकर्मीहरुलाई दिएको जानकारी अनुसार इलाम जिल्लामा ८ हजार ८ सय ६३ जना ६० देखि ६४ वर्ष उमेर समूहको लागि खोप लगाउने भनिएता पनि खोपको उपलब्धताको कारण ६३ देखि ६४ वर्ष उमेर समुहका ४ हजार ४ सय ३१ जनालाई मात्र खोप लगाईने भएको हो । जस अनुसार इलाम, देउमाई, माई र सुर्योदय नगरपालिकामा क्रमशः ७ सय ६१, ५ सय, ५ सय ६ र ८ सय ७० भायल खोप लगाईने बताईएको छ । त्यस्तै माईजोगमाई, सन्दकपुर, फाकफोकथुम, माङसेबुङ, चुलाचुली र रोङ गाउँपालिकामा क्रमशः ३ सय २१, २ सय ४४, ३ सय २८, २ सय ८२, ३ सय २९ र २ सय ९० जनालाई खोप लगाईनेछ ।
इलाम जिल्लाको ४ प्राथमिक स्वास्थ्य केन्द्र (प्याङ, पशुपतिनगर, फिक्कल र मंगलबारे), ४४ वटा स्वास्थ्य केन्द्र (साबिक गाविसमा रहेको स्वास्थ्य चौकी) र इलाम सदरमुकाममा रहेको मातृ शिशु स्वास्थ्य क्लिनिकमा यो खोप लगाईन्छ । यसको अलावा इलाम नगरपालिकाको हकमा भने साखेजुङ, सुम्बेक, पुवामझुवा, बरबोटे, गोदक, सोयाक, साङरुम्बा स्वास्थ्य केन्द्र र इलाम सदरमुकामको मातृ शिशु क्लिनिक रहेको छ । उक्त खोप केन्द्रमा जाँदा जन्म मिति २०१४।०१।०१ देखि २०१६।०१।०१ साल भित्र रहेको उमेर समुहका व्यक्तिले उमेर खुल्ने नेपाल सरकारद्धारा जारी गरिएको कुनै पनि परिचय लिएर जानु पर्ने जनाईएको छ । स्मरण रहोस यस उमेर समुहका व्यक्तिहरुलाई जेठ २७ गतेसम्म मात्र खोप प्रदान गरिने छ ।
स्वास्थ्य कार्यालय इलामले दिएको जानकारी अनुसार हाल लगाउादै गरेको भेरोसेल खोप पनि कोभिसिल्ड खोप झैं २ पटक ३ देखि ४ महिनाको अन्तरालमा लगाउनु पर्ने हुन्छ । १८ वर्ष उमेर माथिका सबैले लगाउन मिल्ने यो खोप एलर्जी भएका व्यक्ति, भ्याक्सिनबाट एलर्जी हुने व्यक्तिले खोप प्रयोग नगर्न सुझाव रहेको छ । त्यस्तै रगत पातलो बनाउने औष्धी सेवन गर्ने व्यक्ति, दिर्घ रोगीहरुले चिकित्सकको निगरानीमा खोप लगाउन सकिने समेत जनाईएको छ ।
