इलाम, ४ फागुनः आफ्नो वार्षिक उत्सवको अवसरमा प्रवासी इलामेली जनसम्पर्क मञ्च मलेसियाले इलामस्थित राहसल बाल अनाथलय तथा माई भगवती बृद्धाश्रमलाई आर्थिक सहयोग गरेको छ । सन् २००७ फेब्रुअरी ११ तारिखमा स्थापना भएको मञ्चले १४ औं वार्षिक उत्सवको अवसरमा दुई संस्थालाई नगद दश÷दश हजार रुपैंयाँ सहयोग गरेको हो । मञ्चले इलाम ग्रीन फेसबुक पेज मार्फत उक्त सहयोग उपलब्ध गराएको हो ।
यसै गरी इलाम नगरपालिका वडा नं. ५ मा रहेको अमर उच्च माध्यमिक विद्यालयमा कक्षा ११ मा अध्ययनरत कम्प्युटर विज्ञानका छात्र-छात्राहरुले श्रीपञ्चमीकै अवसरमा राहसल बाल अनाथलयमा आश्रित बालबालिकाहरुलाई मिष्ठान्न भोजन उपलब्ध गराउनका साथै शैक्षिक सामाग्रीहरु समेत वितरण गरेका छन् । विद्यार्थीहरुलाई सामाजिक कार्य गर्न उत्प्रेरणा दिलाउनको लागि यस प्रकासको कार्य आयोजना गरिएको उक्त विद्यालयका शिक्षक अजुर्न ढुंगानाले जनाएका छन् ।
