इलाम, १६ जेठः पश्चिम रुकुमको चौरजहारी नगरपालिका ८ सोतीमा भएको हत्याकाण्डको इलाममा पनि विरोध भएको छ । इलाम जिल्ला स्थित विभिन्न अधिकारकर्मी संघ संस्थाहरुले शुक्रबार एक कार्यक्रमको आयोजना गरी जिल्ला प्रशासन कार्यालय मार्फत प्रधानमन्त्रीलाई ज्ञापन पत्र बुझाएका छन् । इलाम सदरुमकामको ठुलो टूँडिखेलबाट शुरु गरिएको विरोध र्यालीले जिल्ला प्रशासन कार्यालय पुगि प्रमुख जिल्ला अधिकारीलाई ज्ञापन पत्र बुझाएको हो ।
यसरी उक्त बर्बर हत्याकाण्डको सत्यतथ्य छानबिन गर्न र अपराधीलाई हदै सम्मको कडा कारवाही गर्न माग गर्दै जिल्लाका नेपाल दलित मुक्ति समाज, नेपाल दलित संघ, नेपाल मानव अधिकार संगठन प्रद्श नं. १, गैर सरकारी संस्था महासंघ, नेपाल आदीबासी जनजाति महासंघ, इलाम उद्योग वाणिज्य संघ, नेपाल पत्रकार महासंघ, मानव अधिकार एलायन्स, मानव अधिकार मञ्च, प्याग नेपाल, उत्पीडित जातिय अधिकार मञ्च, दलित महिला संघ, समाजसेवी काले दमाई स्मृति प्रतिष्ठान, नेपाल सिलाई कटाई व्यवसायी संघ, सुनचाँदी व्यवसायी संघ, चेतना नाट्य समूहराष्ट्रिय दलित पत्रकार संघ लगायतका प्रतिनिधिहरुले माग गरेका छन् । कार्यक्रमका अगुवाई गरेका नेपाल दलित मुक्ति समाजका प्रतिनिधि नवराज शंकरका अनुसार यो कार्यक्रम १ नं. प्रदेशको १४ वटै जिल्लाहरुमा एकसाथ सम्पन्न गरिएको र चरणवद्ध रुपमा आन्दोलनको कार्यक्रमहरु अगाडि बढ्ने बताईएको छ ।