पुस २, इलाम: इलाम नगर क्षेत्रमा बसोबास गर्ने ३० घरधुरीलाई निशुल्क सुङ्गुरको पाठी वितरण गरिएको छ । व्यवसायिक आय आर्जनमा टेवा पु¥याउने हेतुले इलाम नगरपालिका वडा नंं ७ मा बसोबास गर्ने विपन्न घरधुरीलाई सुङ्गुरको पाठी वितरण गरिएको हो । वडा नं. ७ कार्यालयको आर्थिक तथा प्राविधिक सहयोगमा आदर्श बहुउद्देश्यीय सहकारी संस्था इलामले पाठी वितरण गरेको हो ।
भुनी वितरण कार्यक्रममा इलाम नगरपालिका कार्यपालिका सदस्य इन्दिरा पौडेल, वडा सदस्य सञ्जिव राई, वडा सदस्य बसन्ती घतानी, पुर्व उपमेयर कृष्ण श्रेष्ठ लगायतले मन्तव्य राखेका थिए । सहकारीले सुङ्गुरको भुनीलाई विउपुजीको रुपमा प्रयोग गर्नुपर्ने मापदण्ड राखेको छ । एक बर्ष सम्म सुङ्गुर उपचार तथा स्याहारको लागि सहकारीले १० हजार मुल्यको कोष समेत स्थापना गरेको सहकारीका अध्यक्ष महेश श्रेष्ठले बताए । उनले भने, ‘बच्चा उत्पादन गरि जिविको पार्जनको लागि सहयोग पुगोस् भनेर कार्यक्रम ल्याईएको हो । निशुल्क भुनी पाउने कुनै परिवारले पनि बुच्चा मास्न बेच्न पाउदैनन् ।’
सुङ्गुरको बुच्चा वितरण गर्दै वडाध्यक्ष नरेश श्रेष्ठले ब्यवसायिक रुपमा सुङ्गुर पाले नपालेको अनुगमन गरिने बताए । उनले भने, ‘न्युन आय भएकालाई आयआर्जनमा बृद्धि होस् भनेर यो कार्यक्रम ल्याईएको हो ।’
