इलाम, ४ कार्तिकः इलाम नगरपालिका वडा नं. ९ घर भई हाल बेलायतमा बसोबास गर्दै आएकी इलामे चेली अन्जना गुरुङले इलाम सदरमुकाम वडा नं. ५ बरबोटेमा रहेको बौद्धिक अपांगता भएका बालबालिकाहरु अध्ययन गर्ने अमर माध्यमिक विद्यालयमा २ थान इन्डक्सन चुल्हो, सिलाई मेसिन उपलब्ध गराएकी हुन । यसै गरी उनले इलाम नगरपालिका वडा नं. ९ मा रहेको राहसल बालआश्रममा खेलकुदको सामाग्री प्रदान गरेकी छिन् । उनले आश्रममा रहेका बालबालिकाहरुको स्वस्थ्य रहनको लागि चिप्लेटी र पिङ उपलब्ध गराएकी हुन । यस अघि सोही आश्रममा ग्याँस गिजर समेत उपलब्ध गराएकी थिईन । कोभिड १९ को संक्रमण बढे पछि गुरुङले बेलायतमा मास्क बनाएर बिक्री गर्ने गरेकी थिईन । सोही मास्क बिक्रीबाट आम्दानी गरेको रकमले नैं आफ्नो जन्मथलोमा सामाजिक काम गरेकी हुन ।
उनले उक्त कार्य सम्पन्न गरे पश्चात आफ्नो फेसबुकमा लेखेकी छिन- “आजबाट इलाम भन्ज्याङ्ग स्थित रासहल अनाथालय बालगृहमा नानीहरुले आफ्नै आँगनमा पिङ र चिप्लेटी खेल्नु पाउने भएका छन । अब यो खेलकुदका सामानहरु अनाथ बालबालिकाहरुले मात्रै नभै यसले बाहिरका बालबालिकाहरु समेत आकर्षण गर्ने छ, उनीहरु खेल्न भित्र आएर खेल्न पाउँदा स्वस्थ्य मनोरञ्जन, एक आपसमा भाइचारा मित्रता बढने बाहिरी वातावरण साथीभाईहरुसँगको घुलमिलले ति अनाथ बालबालिकाहरुले पनि सामाजिक हिनताबोध हराउदै समानान्तर रुपमा सामाजिक रुपान्तरण हुनेछ भन्ने मलाइ लागेको छ ।
यो कार्यलाई विषम परिस्थितिमा पनि सहज ढङ्गबाट पूरा गराउने सम्पुर्ण सहयोगी हातहरुमा प्रति मेरो हार्दिक नमन छ । त्यसै गरी कोरोनाको कहरमा पनि दिनरात खटिदिनु हुने इलाम भालुढुङ्गा सामुदायिक पर्यटन प्रवर्द्धन विकास समितिका अध्यक्ष हरी गुरुङ, राहसल बालआश्रमका व्यवस्थापक नारायण पराजुली, ग्रील उद्योगका सन्चालक कृष्ण पौडेल लगायत सम्पुर्ण टीमहरुको सहयोग बिना यो सबै सम्भव थिएन ।”
स्मरण रहोस समाजसेवी गुरुङले हालै राष्ट्रिय नारी सम्मान २०७६ बाट समेत सम्मानित भई सकेकी छिन् ।
