इलाम, १६ भदौः इलाम सदरमुकाम भित्र रहेको केही चर्चित र ऐतिहासिक धाराहरु मध्ये इलाम नगरपालिका वडा नं. ७ माईस्थान जाने बाटो नजिक रहेको हिटीधारा पनि एक पर्दछ । सदरमुकाम भित्र रहेका धोबीधारा, कर्णेल धारा, कुलधारा, ओपीधारा, जोरधारा, सरदार धारा, च्यान्टे धाराहरु वर्तमान परिवेशमा कुनै अस्तित्वमा छैन भने कुनै धाराहरु अस्तित्व रक्षाको लागि संर्घषरत छन् । यस्तै संर्घषरत धाराहरु मध्ये एक हो इलाम बजारकै मुटुमा रहेको “हिटीधारा” । नेपाल भाषामा हिटी भनेको धारा हो । यस धाराको पानी खाएर हिटीधारा वरपरका निकै घर परिवारहरुले अतित बिताएका छन् । तर सदरमुकाममा घरघरमा खानेपानी वितरण गर्ने सुविधा इलाम नगरपालिकाबाट प्राप्त गर्न थालेपछि यस्ता हिटीधाराहरु ओझेलमा पर्दै गए ।
इलाम बजारको प्रकाशपथ नेवार समुदायको बाहुल्यता भएको टोल हो । यसै टोलबाट इलाम सदरमुकामको प्रमुख केन्द्र रहेको वडा नं. ७ का वडाध्यक्ष नरेश श्रेष्ठ समेतले यही हिटीधाराको पानी खाएर हुर्किएको स्थानीबासीहरु बताउँछन् । तर वडाध्यक्ष श्रेष्ठको नजरमा आफ्नै घर अगाडी भग्नावशेष बन्दै गरेको ऐतिहासिक धारा कहिले पर्न नसकेको स्थानीयबासी ग्रीन इलामसँग गुनासो पोख्दछन् । उनीहरु भन्छन्- ‘यही पानी खाएर हुर्किएका वर्तमान वडाध्यक्ष नजर धारा संरक्षणमा चिन्तित छैनन्, उनी त चियाबारी सुन्दर बनाउने ध्यानमा एकोहोरो लागि रहेका छन् ।’ स्मरण रहोस् इलाम नगरपालिकाले नगरबासीको लागि खानेपानीको धारा वितरण गरेपछि चोकबजार, भानुपथ आसपासमा रहेका सार्वजनिक धाराहरु बन्द गरेता पनि हिटीधारामा नियमित रुपमा खानेपानी प्रवाह गर्ने व्यवस्था मिलाएको थियो ।
