इलाम, १६ साउनः पछिल्लो समय इलाम नगरपालिकामा कोरोना भाईरसको संक्रमण बढ्दै गईरहेको पाईएको छ । यसरी संक्रमित हुनेहरु समुदायको नभएर सुरक्षाकर्मीहरु रहेका छन् । क्वारेन्टाईनको सुरक्षामा बसेका शसस्त्र प्रहरी बलका सुरक्षाकर्मीहरुमा कोरोना संक्रमण देखिएको हो । शुक्रबार प्राप्त पिसिआरको प्रतिवेदनमा ५ जना शसस्त्र प्रहरीहरुलाई संक्रमण देखिएसँगै उक्त संख्या १० पुगेको छ । शुक्रबार प्राप्त प्रतिवेदन पछि भने इलाम सदरमुकामबासीहरु केही त्रसित बनेका छन् ।
शसस्त्र प्रहरी बलको क्याम्प रहेको र क्वारेन्टाईन क्षेत्र वरपरका बासिन्दाहरुका अनुसार शसस्त्र बलमा संक्रमितको संख्या बढ्दै गएको तर ति क्याम्पहरुमा सुरक्षा सावधानी नअपनाएको आरोप लगाउँछन् । संक्रमितका परिवारहरुको पनि पिसिआर जाँच नगरिनु र क्याम्प क्षेत्र सिल नगरिनुले त्यहाँ त्रास बढेको हो । उक्त क्याम्प रहेको क्षेत्रमा मालपोत कार्यालय, नापी कार्यालय, उच्च अदालत बिराटनगर इलाम इजलासको सरकारी वकिलको कार्यालय, नेपाल टेलिकम, जिल्ला प्रशासन कार्यालय, उच्च अदालत इलाम इजलास, प्रहरी कार्यालय, रेडक्रस सोसाईटी जस्ता सरकारी एवम गैरसरकारी कार्यालयहरु रहनुका साथै नगरको घना बस्ती भएको क्षेत्र हो ।
यता इलाम नगरपालिकाले भने आफ्नो सामाजिक संजाल फेसबुक मार्फत नगरबासीहरुलाई त्रसित नहुन आग्रह गरेको छ । उसले भनेको छ- इलाम नगरपालिकाको पछिल्लो कोरोना रिपोर्ट अनुसार हालसम्म समुदायका कोहिपनि नागरिकमा पोजेटिभ नदेखिएको शसस्त्र क्याम्पका ५ जनामा थप पोजेटिभ देखिएको छ तर सामाजिक सञ्जालमा यदाकदा भ्रम फैलाइएको पाइएकोले सत्य नभएको सवैमा जानकारी गराइन्छ ।
यसका साथै इलाम नगर सिल गर्ने कुरा हल्ला मात्र भएको र यस्तो हल्लाको पछाडि नलाग्न हुन र्सवसाधारण नगरवासीहरुमा हार्दिक अनुरोध छ । साथै यस प्रकारको र्सवसाधारण त्रसित तथा आतंकित हुने खालको र आधिकारिक निर्णय नभएको भ्रामक हल्ला गरी भ्रम फैलाउने व्यक्तिलाई कार्यवाही हुने जनाएको छ ।
