इलाम, ६ असारः इलाम जिल्लाबाट वैदेशिक रोजगारमा गई विदेश पुगेर समस्यामा पर्नेहरु मध्ये धेरै जना आफ्नो कागजातहरु सुरक्षित नगर्नेहरु रहेको एक तथ्यांकले औल्याएको छ । उनीहरुले आफ्नो पासपोर्ट, नागरिकता, श्रम इजाजत पत्र, विदेशमा काम गर्ने कम्पनीसँग गरिएको सम्झौता जस्ता अति महत्वपूर्ण कागजातहरु व्यवस्थित र सुरक्षित नराख्दा विदेशमा आई पर्ने समस्याहरु समाधान गर्न कठिनाई भईरहेको शनिबार इलाम सदरमुकाममा आप्रवासी स्रोत केन्द्र इलामले आयोजना गरेको सुरक्षित आप्रवासन परियोजना अन्र्तगत इलामका संचारकर्मीहरुसँग गरिएको अन्र्तक्रिया कार्यक्रम जनाईएको हो । यसका साथै वैदेशिक रोजगारमा जानेहरु कानुनी समस्यामा पर्ने, मनोसामाजिक तनावमा पर्ने, उनीहरुलाई वित्तिय साक्षरताको अभावमा देश भित्रिएको रेमिट्यान्सको सही सदुपयोग नहुने जस्ता समस्याहरु पनि सँगसँगै आउने गरेको कार्यक्रममा जनाईएको छ ।
गत मंसिर महिनादेखि इलाम जिल्लाका चार वटा नगर तथा गाउँपालिकामा संचालन भईरहेको सुरक्षित आप्रवासन परियोजनाले विदेश जाने महिला तथा पुरुषहरुलाई परामर्श, मनोसामाजिक परामर्श, वित्तिय साक्षरता, आधारभूत तालिम (पुरुषको लागि प्लम्बर, मेसन, इलेक्ट्रिसियन, स्काफोल्डर र महिलाको लागि गार्मेन्ट) उपलब्ध गराउने गरेको छ । कोभिड १९ को असर पर्न अघि यस केन्द्रले जिल्लाको विभिन्न पालिकाहरुमा वैदेशिक रोजगारीमा जानेहरुको परिवारमा गई उनीहरुको कागजातहरु सुरक्षित राख्ने विषयमा सल्लाह सुझाव दिने गरिएको समेत जनाईएको छ । यसका साथै देश भित्रिएको रकमलाई सही सदुपयोग गर्नको लागि वित्तिय साक्षरताको कक्षाहरु संचालन गर्दै आईरहेको जनाईएको छ । निकट भविष्यमा यस कार्यक्रमलाई प्रभावकारी बनाउन प्रत्येक वडा, पालिका र जिल्लामा आप्रवासी संजाल गठन गर्ने तयारी भईरहेको परियोजनाका कार्यक्रम संयोजक ईश्वरी तामाङले जानकारी दिएका छन् ।