इलाम, ९ जेठः कोरोना भाईरसको कारण मुलुक लगायत विश्वभर जारी लकडाउनले पृथ्वीबासीको जीवन शैलीलाई तहसनहस पारेको छ । तर लकडाउनको कारण एउटा क्षेत्रमा भने सकारात्मक असर पुगेको छ, त्यो हो प्राकृतिक वातावरण । यसैको सकारात्मक प्रभाव हो इलाम सदरमुकामको ठुलो टुँडिखेल । गत फागुन महिनाको अन्त्यमा त्यहाँ सम्पन्न माईभ्याली गोल्डकप फुटबल प्रतियोगिता संचालन हुँदा ताका टुँडिखेलमा एउटा पनि हरियोपना थिएन । अर्थात चौरको नाममा एउटा झारसम्म थिएन । त्यही माथि विभिन्न कार्यक्रम गर्ने बाहनामा, खेलकुदका विभिन्न प्रतियोगिताहरु संचालन हुँदा र शिकारुहरुले मोटरसाईकल तथा स्किुटर सिक्नको लागि समेत टुँडिखेलको प्रयोग गरेर दोहोन गर्दा कुनै उजाड मरुभूमि तुल्य भएको थियो ठुलो टुँडिखेल ।
तर जब मुलुकमा लकडाउनमा लागु भयो त्यसपछि टुँडिखेलको भूमिमा हुने कुनै पनि माथि उल्लेखित कार्यहरु पुर्णतया बन्द हुन पुग्यो । त्यस सँगसँगै प्रि-मनसुन प्रारम्भ भयो । टुँडिखेल माथि हुने सबै कार्यक्रम बन्द भएपछि त्यहाँ उम्रिएका चौरहरु मासिन पाएनन् । र बिस्तारै टुँडिखेलमा फेरी हरियाली छाउन थालेको छ । जसले गर्दा विगतमा देखिएको हरियो टुँडिखेल अब पुनः देखिन पाईने आशा इलामबासीमा संचार हुन थालेको छ । यसै क्रममा टुँडिखेल नजिकका स्थानीयबासीहरु लकडाउनको समयावधी लम्बिरहेको अवस्थामा टुँडिखेल क्षेत्रको चौर नउम्रिएको स्थानमा चौर रोप्न पाए त्यहाँ पनि चाडै हरियाली थपिने हुँदा त्यसमा सरोकारवाला निकायहरुले ध्यान पुर्याउन ग्रीन इलाम मार्फत आग्रह गरेका छन् ।
