होम दुलाल
सपना नै देख्न नसक्नेले
यो देशमा बाँच्नु धिक्कार छ !
देशको ढिकुटी तिम्रो होइन
आचार , विचार र सदाचारका
आडम्बरी कुरा गरेर साँच्नु धिक्कार छ ।
हिमाल पहाडहरुका डाँडैडाडा
पानीजहाजहरु तैरिरहेका अद्भुत दृष्य
राजमार्गमा मात्र होइन
टोलेसडकहरुमा समेत
वाइडवडी जहाजहरु अवतरण भएर
विश्व चकित भैरहेका बेला
बिना लिक पनि रेल , मोनोरेल र मेट्रोरेल
पुर्व- पश्चिम , उत्तर- दक्षिण
यात्रु पर्खिरहेका छन
अन्तराष्ट्रीय विमानस्थलमा जहाज “ग्राउण्डेड” भएका
समाचार प्रकासन प्रशारण गरेर
पत्रकारहरु हो ! दुनिया ढाँट्नु धिक्कार छ !
“मेरो सरकार”का मेगा नीति कार्यक्रम
र चटकी आस्वासनहरुबाट छटपटिएर
सांसदहरुले गरिमामय संसदमा
“कुण्ठा “र “आक्रोश ” मिश्रीत “निम्छरा “अभिव्यक्ती
अभिव्यक्त गर्नु धिक्कार छ !
बरु
सपना देख्नुहोस र सपनामै अघाउनुहोस
सपनामै रमाएर सपनाकै सम्मृद्धिमा होसै गुमाउनुहोस
कर आतंकको भो कुरा नगर्नुहोस अतिभयो
हाम्रा कुनै सरकारले सपनामा कर लगाएको छैन
“योगदानमा आधारित नयायुग”को प्रारम्भ भएको छ
कम्तिमा रहरलाग्दा सपना देखेर योगदान पुर्याउनुहोस ।
२०७६/०२/१०
