इलाम, ११ जेठ ः प्रधानमन्त्री खड्गप्रसाद ओलीको सिफारिस राष्ट्पति विद्यादेवी भण्डारीले गत जेठ ८ गते राती गरेको संसद विघटनको कदमको इलाम जिल्लास्थित विपक्षी दलहरुले विरोध गर्दै उक्त कदमको विरुद्ध एकजुट हुन आह्वान गरेको छ । जेठ ११ गते मंगलबार नेपाली कांग्रेसका जिल्ला सभापति हिमालय कर्माचार्य, नेकपा माओवादीका जिल्ला संयोजक सोममाया राई र नेकपा एमालेका जिल्ला उपाध्यक्ष भक्त केसीद्धारा हस्ताक्षर गरी संचार माध्यमहरुलाई पठाईएको ईमेलमा बताईए अनुसार प्रधानमन्त्री केपी शर्मा ओलीको सिफारिसमा राष्ट्रपति विद्यादेवी भण्डारीले २०७८ जेठ ८ गते प्रतिनिधि सभाको विघटन गरि मध्यावधी निर्वाचन घोषणा गर्ने असंवैधानिक, अलोकतान्त्रिक, अनैतिक, अराजनैतिक, स्वेच्छाचारी र अधिनायकवादी कदम प्रति हाम्रो गम्भीर ध्यानाकर्षण भएको छ । राष्ट्रपति र प्रधानमन्त्रीले बदनियतपूर्ण किसिमले प्रतिनिधि सभाको विघटन गरि नेपालको संविधान र लोकतन्त्रमाथि नै गरिएको प्रहार एवं गैरजिम्मेवार कार्यको घोर निन्दा एवं भत्र्सना गर्दछौं ।
यस्तै विज्ञप्तीमा कोभिड–१९ महामारीको भयावह परिस्थिति भोगिरहेको नागरिकको लागि यसको रोकथाम, नियन्त्रण र उपचार सर्वाधिक प्राथमिकताको विषय हो । त्यसैले कोभिड–१९ ले मुलुक आक्रान्त भएको बेला औषधी, अक्सिजन, अस्पताल–शैया नपाएर नागरिकहरू रोइरहेका बेला निर्वाचनको घोषणा गर्नु मानवीय संवेदनाहीन क्रुरता हो । उल्लेख गरिएको छ ।
विज्ञप्तीको अन्त्यमा राष्ट्रपति र प्रधानमन्त्रीबाट प्रतिनिधि सभाको विघटन गर्ने प्रतिगमनकारी कार्यका विरुद्ध एकजुट भई नेपाली जनताको लामो आन्दोलन, संघर्ष र बलिदानबाट स्थापित नेपालको संविधानमा अन्तर्निहित संघिय लोकतान्त्रिक गणतन्त्र, समावेशी लोकतन्त्र, समानुपातिक–समावेशी एवम नेपालको सर्वोपरि राष्ट्रिय हितको रक्षाका लागि दृढतापूवक अगाडि बढ्न हामी सम्पुर्ण राजनैतिक दल तथा जनसमुदायमा हार्दिक आह्वान गर्दछौ ।
हेर्नुस संयुक्त प्रेस विज्ञप्ती
