कोरोना छ भनि अफवाह फैलाएर इलामे पत्रकार आतंकित गर्ने एक पक्राउ

इलाम, वैशाख ६ शनिबारः इलाम सदरमुकाम वडा नं. ५ स्थित बिब्ल्याँटे बजारमा एकजना कोराना भाईरस संक्रमित भेटिएको भन्दै फेसबुकमा समाचार अपलोड गर्ने एकजना व्यक्तिलाई प्रहरीले नियन्त्रणमा लिएको छ । हिजो शुक्रबार उनले आफ्नो सामाजिक संजाल फेसबुक पेजमा एकजना पत्रकारलाई ट्याग गर्दै कोरोना संक्रमित व्यक्ति भेटिएको पोष्ट गरेका थिए । उनको यो पोष्टले इलाम भएका सम्पुर्ण पत्रकारहरुमा शुक्रबार मध्य रातसम्म तरंग फैलिएको थियो । तर सोही समय सो पोष्ट गर्ने व्यक्तिले आफ्नो पोष्ट मेटाएपछि त्यो हल्ला निराधार भएको पत्रकारहरुले प्राप्त गरेका थिए ।
जिल्ला प्रहरी कार्यालय इलामले आज शनिबार एक इमेल संप्रेषण गर्दै यसरी अहफाव फैलाउने व्यक्तिलाई नियन्त्रणमा लिएको जनाएको छ । फाकफोकथुम गाउँपालिका वडा नं. ७ बस्ने सन्दिप योंगहांगलाई भ्रामक पोष्ट गर्ने कसुरमा शनिबार नियन्त्रणमा लिएको हो । उनलाई अनुसंधान जारी राखिएको प्रहरी नायब उपरिक्षक हेमन्त भण्डारीले जानकारी दिएका छन् ।