झापामा थपिए ९ कोरोना पोजेटिभ, अब इलाम जोखिमको उच्चतम बिन्दुमा

जेठ ६, इलाम : झापामा आज मंगलबार ९ जना कोभिड १९ संक्रमित थपिएका छन्। झापाका ९ र सुनसरीका २ सहित प्रदेश १ मा मंगलबार ११ जनामा कोभिड १९ संक्रमित थपिएका हुन्। झापाको कचनकवल गाउँपालिकाका ९ जनामा संक्रमण पुष्टि भएको कोशी अस्पतालले नागरिकन्युजलाई जनाएको छ। कोशी अस्पतालको प्रयोगशालामा उनीहरुको परीक्षण भएको थियो। सोमबार कचनकवलकै एक जनामा संक्रमण देखिएको थियो। उनकै सम्पर्कमा रहेका थप नौ जनामा संक्रमण देखिएको मुख्यमन्त्री कार्यालय स्रोतले नागरिकन्युजलाई जनाएको छ। यो सँगै इलाम कोरोना जोखिमको उच्चतम बिन्दुमा पुगेको छ । इलाममा कुनैपनि बेला कोरोना भित्रिन सक्ने भन्दै सजगता अपनाउन विज्ञहरुले सुझाएका छन् । इलामको खाद्य पसल, ग्यास स्टेसन तथा अन्य स्थानमा सामाजिक दुरीको नियम पालना नभएको भन्दै विज्ञहरुले यस्तो व्यवहारले इलाम भल्नरेबल भएको बताएका छन् ।
हाल यस प्रदेशमा संक्रमितको संख्या ५४ पुगेको छ। त्यसमध्ये १७ जना उपचारपछि घर फर्केका छन्। त्यस्तै सुनसरीको इटहरीका एक जना युवक र एक जना प्रहरीमा संक्रमण पुष्टि भएको छ। धरानस्थित वीपी कोइराला प्रतिष्ठानमा भएको परीक्षणमा उनीहरुमा संक्रमण देखिएको हो।