इलाम, १८ वैशाख स्वस्थ्य जीवन प्रर्वद्धन कार्यक्रम अन्तर्गत तीन दिने योग तथा जीवन शैली तालिम शनिबार इलाम सदरमुकाममा सम्पन्न भएको छ । मेची आर्युवेद औषधालय अस्पताल सुर्योदय नगरपालिकाको आयोजनामा सम्पन्न भएको तालिममा इलाम जिल्लाको दश वटा पालिकामा रहेको एक/एक वटा सामुदायिक विद्यालयका नर्स तथा माध्यमिक विद्यालयका स्वास्थ्य शिक्षकहरुको लागि यो तालिम प्रदान गरिएको मेची आर्युवेद औषधालयका प्रमुख आर्युवेद चिकित्सक विजय श्रेष्ठले जानकारी दिनु भएको छ ।
नेपालको वर्तमान स्वास्थ्य अवस्था हेर्ने हो भने दिनानुदिन सर्ने भन्दा नसर्ने रोगको कारण मान्छेको मृत्युदर बढिरहेको छ । मानव जीवन शैलीलाई थोरै मात्र पनि परिवर्तन गर्ने हो भने नसर्ने रोगबाट मृत्यु हुनेको संख्या न्युनिकरण हुन जान्छ । यसको लागि मानिसले योग तथा गाउँघरमा पाईने जडिबुट्टीहरुको सेवन गर्नाले पनि स्वास्थ्यमा सकरात्मक असर पर्न जान्छ । तालिमको यिनै मुख्य विषय वस्तुहरु रहेर तालिम संचालन गरिएको प्रशिक्षक कविराज तिर्थराज आचार्यले जानकारी दिनु भयो । उहाँका अनुसार यस प्रकारको तालिमले कोरोना रोगसँग पनि लड्न मद्दत पुग्ने छ, किनकि योग गर्दा मानिसमा स्वास प्रस्वासको बढीमात्र क्रिया हुने हुँदा कोरोना भाईरस पनि स्वास प्रस्वाससँग सम्बन्धित भएकोले योग गर्नु फाईदाजनक रहेको छ ।
तालिममा सहभागीहरुलाई बिहान पाँच बजेदेखि नै प्रयोगात्मक रुपमै योग गराएर संचालन गरिएको तालिमका सहभागी प्रमोद रिजालले बताउनु भयो । करिब ६० प्रकारको योगको आसनहरु तालिमको क्रममा सिकाईएको थियो । तालिम प्राप्त गर्ने शिक्षक तथा विद्यालय नर्सहरुले आफ्नो पालिका, विद्यालयमा विद्यार्थी तथा समुदायका अन्य व्यक्तिहरुलाई योग सिकाएर योगदान गर्न आयोजक संस्थाले अनुरोध समेत गरेको थियो ।
