इलाम, २७ भदौ ः इलाम नगरपालिका वडा नं. ८ सिङफ्रिङ तथा करदाता सेवा कार्यालय आसपासका केही उपभोक्ताहरुको घरमा नेपाल टेलिकमद्धारा वितरण गरिएको टेलिफोन लाईन विगत ६ दिनदेखि अवरुद्ध हुँदा समेत मर्मतको लागि नेपाल टेलिकम इलाम शाखाले चासो नदिएको स्थानीयबासीको आरोप रहेको छ । उनीहरुले सम्बन्धित निकायमा बारम्बार गुनासो दर्ता गराउँदा पनि हाल सम्म मर्मतको लागि कुनै पहल नभएको बताईएको छ । टेलिफोनको लाईन अवरुद्ध हुँदा उपभोक्ताहरु इन्टरनेट सेवाबाट समेत वञ्चित हुनु परेको छ ।
इन्टरनेट सेवा अवरुद्ध भएपछि स्थानीय उपभोक्ता तथा संचारकर्मी सबिता पाण्डेलाई दैनिक रुपमा गर्नु पर्ने समाचार प्रवाहमा समेत असर पुगेको बताउँछिन । सोही क्षेत्रकी शिक्षिका कञ्चन घिमिरे सदरमुकाममा नै टेलिकमको मर्मत सेवाको हालत यस्तो छ भने दुर्गम गाउँघर तिरको हालत झन कति भयावह हुने आँकलन गर्छिन । अवरुद्ध टेलिफोन सेवाबाट प्रदिप खडका, राजु बस्नेत, लिला घिमिरे, महेश खडका लगायतका उपभोक्ताहरु मारमा परेका छन् ।