इलाम, २५ साउनः इलाम सदरमुकाममा निर्माणको अन्तिम चरणमा पुगेको सिटीमार्ट विवादमा तानिएको छ । स्थानीयबासी र सिटीमार्ट निर्माण गर्दै गरेको इलाम नगरपालिका बिच असमझदारी बढेर विवाद चुलिएको हो । स्थानीयका अनुसार सिटीमार्ट निर्माण गर्दा सो व्यापारिक भवनको अगाडी पार्किङ, बगैचा तथा उक्त भवनमा आउने ग्राहकहरु बस्ने ठाउँ बनाउने नक्सामा उल्लेख गरिएको थियो तर अहिले आएर उक्त खाली राखिने भनिएको ठाउँमा पनि चार कोठाको व्यवसायिक भवन बनाउन लागिएकोले उक्त कार्यको विरोध गरिएको हो । अझ स्थानीयबासीहरु सो भवन बनाउनको लागि इलाम नगरपालिकाले नक्सा पास नगरेको समेत आरोप लगाउँछन् । उनी भन्छन्- ‘नक्सा पास गर्नको लागि चार किल्लाका सधियाँरहरुलाई जानकारी हुनु पर्ने हो तर हामीलाई कुनै जानकारी छैन ।’ उनीहरु नगरपालिकाले भवन निर्माण अघि तयार पारिएको नक्सा अनुसार भवन निर्माण गरिनु पर्नेमा जोड दिन्छन् ।
उक्त भवनमा लगानी गर्नेहरु समेत यस विषयमा असहमत प्रकट गर्दछन् । ति लगानीकर्ताहरु भवन पहिलेको नक्सा अनुसार तयार नभएको, मुख्य व्यापारिक भवन अगाडीको बन्दै गरेको व्यापारिक भवनमा कसले पसल गर्ने हो वा त्यो नगरपालिकाको “प्राईम रुम” को रुपमा अहिलेका लगानीकर्ता देखि बाहेकलाई दिने भन्नेमा अन्यौल रहेको बताउँछन् । उता नगरपालिका भने, पुरानो ट्याक्सी स्टेण्ड अगाडीका सम्पुर्ण सटर/कवल भत्काएर पार्किङ गर्ने व्यवस्था मिलाउन लागिएकोले सिटीमार्टमा पार्किङको समस्या नहुने बताउँछ । आईतबार बिहानदेखि स्थानीयबासी र सिटीमार्ट निर्माण गर्ने कम्पनीका प्रोपाईटरबिच विवाद भईरहेपछि इलाम नगरपालिकाले जिल्ला प्रशासन कार्यालय तथा जिल्ला प्रहरी कार्यालय इलाममा काम रोक्न खोज्नेहरुलाई कारवाही गर्नको लागि पत्राचार समेत गरेको छ । यसैबिच स्थानीयबासीहरुले नेपाली कांग्रेस तथा नेकपा नगर कमिटीलाई नयाँ बन्दै गरेको भवन रोक्नको लागि अनुरोध गर्नुका साथै इलाम नगरका मेयर महेश बस्नेतलाई पनि स्थानीयबासीको ज्ञापन पत्र बुझाईएको स्थानीय धनमान बराईलीले “इलाम ग्रीन”लाई बताए ।
