विद्यालयको उन्नयनमा सरोकारवालाको भूमिका विषायक दुई दिने गोष्ठी सम्पन्न

इलाम, १२ माघः सरकारी विद्यालयमा पनि निजी विद्यालयको जस्तै अभिभावकहरुको चासो बृद्धि गर्नको लागि इलाम सदरमुकाममा एक कार्यक्रमको आयोजना गरिएको छ । आईतबार र सोमबार इलाम नगरपालिका ८ नं. वडा कार्यालयको आयोजना तथा ज्ञानपुञ्ज सिर्जनशिल प्रतिष्ठानको प्राविधिक सहयोगमा विद्यालयको उन्नयनमा सरोकारवालाको भूमिका विषायक दुई दिने गोष्ठीको आयोजना गरिएको हो । इलाम नगरपालिका वडा नं. ८ मा रहेको जनकल्याण निम्न माध्यमिक विद्यालय, विद्या आधारभूत विद्यालय, महेन्द्रोदय आधारभूत विद्यालय र सिंहदेवी आधारभूत विद्यालयका अभिभावक संघ, विद्यालय व्यवस्थापन समिति तथा शिक्षक शिक्षिकाहरुलाई आधारभूत तहको शैक्षिक गुणस्तर सुधार, एक्काईसौं शताब्दीको शिक्षा विकासमा अधारभूत तहको शिक्षाको भूमिका र महत्व, शिक्षा ऐन नियमावलीको प्रभावकारी कार्यान्वयनमा सरोकारवालको भूमिका, शिक्षामा अंग्रेजी माध्यम र चुनौती, बाल शिक्षण सिकाई, शिक्षकको पेशागत विकास र शिक्षामा नविनतम अवधारण, परिवर्तित पाठ्यक्रमको अवधारण जस्ता विषयहरुमा ज्ञान प्रदान गरिएको थियो ।
वडा नं. ८ का वडाध्यक्ष होमबहादुर बस्नेतको अध्यक्षतामा भएको कार्यक्रममा इलाम नगरका मेयर महेश बस्नेत, महेन्द्ररत्न बहुमुखी क्याम्पस इलामका प्रमुख डा. दिनानाथ फुएल लगायतले कार्यक्रमको औचित्यता माथि प्रकाश पारेका थिए । कार्यक्रममा वडा सदस्य डिपी दुलालले उक्त चारवटा विद्यालयलाई वाटर फिल्टर, सेनिटाईजर स्प्रे मेसिन, सेनिटाईजर तथा स्वास्थ्य सामाग्रीहरु प्रदान गरिएको जनाएका छन् । गोष्ठीलाई छत्रबहादुर तामाङले सहजीकरण गरेका थिए ।