इलाम, ३० वैशाखः गृह मन्त्रालयले लकडाउनलाई थप कडाइ गर्ने भएको छ। मंगलवार मन्त्रालयमा बसेको बैठकले विषेशगरी सवारी आवतजावतलाई कडाइ गर्न लागेको हो । लकडाउनको समयमा एउटा जिल्लाबाट अर्को जिल्लामा जान समेत रोक लगाइएको छ। विभिन्न निकायबाट जारी भएको सवारी पास लिएर मानिस एक जिल्लाबाट अर्को जिल्लामा पुग्ने गरेका थिए ।
‘१ गतेबाट लागू हुने गरी एक जिल्लाबाट अर्को जिल्ला जाने सबै पास खारेज गरिएको हो,’ गृहका सहप्रवक्ता उमाकान्त अधिकारीले भने ।
काठमाडौं उपत्यकाभित्र भने एउटै जिल्लाबाट जारी भएको पासले तीन जिल्लामा जान पाइने छ। त्यस्तै अहिले सरकारले ६ बजेदेखि उपत्यकाभित्र छिर्ने सबै निर्माण सामग्री बोकेका सवारीलाई रोक लगाइएको छ। मालवाहक सवारीले राति ८ बजेदेखि बिहान ६ बजेसम्म मात्र प्रवेश पाउने छन् । त्यस्तै, सरकारी कार्यालयका सवारीलाई बिहान ९ बजेदेखि साढे १० बजेसम्म कर्मचारी कार्यालय ल्याउन र दिउँसो ५ बजेदेखि ६ बजेसम्म फर्किन समय निर्धारण गरिएको छ। यसैगरी, बैंक तथा वित्तीय संस्थाको लागि भने बिहान साढे ९ बजेदेखि साढे १० बजेसम्म कर्मचारी ल्याउन र फर्किन दिउँसो ३ बजेदेखि ५ बजेसम्म समय दिइएको छ ।
