इलाम, ७ जेठ । इलामेहरुको पिडामा मल्हम पट्टी अभियान अन्र्तगत निजी क्षेत्रबाट संकलन भएको स्वास्थ्य सामग्री शुक्रबार इलाम अस्पताललाई हस्तान्तरण गरिएको छ । प्रदेश नं. १ का भूमि व्यवस्था, कृषि तथा सहकारी मन्त्री राम राना, प्रमुख जिल्ला अधिकारी ध्रुवबहादुर खड्का, इलाम उद्योग वाणिज्य संघका अध्यक्ष इश्वर चिपालु मार्फत सामग्री संयुक्त रुपमा हस्तान्तरण गरिएको अभियानका निरोज खड्गीले जानकारी दिए । मन्त्री रानाले कोभिड रोकथामको पहलमा सबै क्षेत्रबाट आवश्यक सहयोग जुटाउने बताए ।
इलाम अस्पताललाई करिब ६ लाख बराबरको सामग्री हस्तान्तरण गरिएको हो । जसमा दुई थान अक्सिजन कन्सन्ट्रेटर, अक्सिमिटर, थर्मल गनहरु, पिपिई, मास्क, सेनिटाइजर लगायतका विभिन्न सामाग्री हस्तान्तरण भएको इलाम उद्योग वाणिज्य संघका वाणिज्य उपाध्यक्ष दिपेश श्रेष्ठले जानकारी दिए । इलाम अस्पतालका मेडिकल सुपरिटेन्डेन्ट डा.प्रभु शाहले अस्प्ताललाई आवश्यक सामग्री पाएको जानकारी दिए । उनले अस्पताललाई जनशक्ति अनुरुप साना तिना स्वास्थ्य सामाग्री ग्लोवस र पिपिइ सेटहरु आवश्यक भइरहने बताए ।
अभियानबाट इलाम अस्पताल र जिल्लाभरि आवश्यक स्वास्थ्य सामाग्री उपलब्ध गराउने र अन्य सहयोग गर्ने उद्देश्य रहेको खड्गीले बताए । कोरोना महामारीको उच्च जोखिम रहेका बेला निजी क्षेत्रबाट सहयोग जुटाएर संक्रमितहरुलाई राहत पुग्ने विश्वास रहेको नेपाल रेडक्रस सोसाइटीका उपसचिव उत्तम पौडेलले बताए ।
कोरोना संक्रमितहरुका लागि आउने सहयोगलार्ई पारदर्शी रुपमा परिचालन गर्न इलाममा पनि कोभिड व्यवस्थापन राहत कोष मार्फत सहयोग जुटाएका छन् । इलाम उद्योग वाणिज्य संघ, नेपाल रेडक्रस सोसाइटी, नेपाल पत्रकार महासंघ, निर्माण व्यवसायी संघ जस्ता संस्थाले सहयोग जुटाउन पहल गरेका छन् । अभियानमा स्वदेश तथा विदेशमा रहेका विभिन्न व्यक्ति तथा संस्थाहरुले सहयोग जुटाएको र जुट्ने क्रम जारी रहेको इलाम उद्योग वाणिज्य संघका अध्यक्ष चिपालुले जानकारी दिए । यस अघि संघले इलाम अस्पताललाई पाँच थान पेसेन्ट बेड उपलव्ध गराएको थियो ।
