इलाम — इलामको माङसेबुङ गाउँपालिकामा आर्थिक वर्ष २०८२/८३ मा छ वटा सामुदायिक विद्यालयका नयाँ भवन निर्माण सम्पन्न भएका छन् । सङ्घीय सरकारको एक करोड २० लाख रुपैयाँको लागतमा तीन कोठे एकतले पक्की विद्यालय भवन निर्माण सम्पन्न भएको गाउँपालिकाको शिक्षा शाखाले जनाएको छ ।
शिक्षा शाखा प्रमुख बुद्धिप्रसाद खतिवडाका अनुसार प्रत्येक विद्यालयमा २० लाख रुपैयाँको लागतमा भवन निर्माण गरिएको हो । यसअन्तर्गत माङसेबुङ–१ का वरभञ्ज्याङ आधारभूत विद्यालय र मण्डिका आधारभूत विद्यालय, माङसेबुङ–२ को इभाङ आधारभूत विद्यालय, माङसेबुङ–३ को जनकल्याण आधारभूत विद्यालय, माङसेबुङ–४ को सरस्वती आधारभूत विद्यालय तथा माङसेबुङ–६ को चन्द्रेश्वरी आधारभूत विद्यालयमा नयाँ भवन निर्माण सम्पन्न भएको हो ।
नयाँ भवन निर्माणसँगै विद्यार्थीले सुरक्षित, व्यवस्थित र गुणस्तरीय सिकाइ वातावरण पाएको विद्यालयहरूले बताएका छन् । वरभञ्ज्याङ आधारभूत विद्यालयका प्रधानाध्यापक कृष्णबहादुर लिम्बूका अनुसार यसअघि जीर्ण भवनमा अध्ययन–अध्यापन सञ्चालन गर्नुपरेको अवस्थामा अहिले विद्यार्थी र शिक्षक दुवैलाई सहज भएको छ । विद्यालयमा प्रारम्भिक बालकक्षादेखि कक्षा ८ सम्म अध्ययन हुने उनले जानकारी दिए ।
इभाङ आधारभूत विद्यालयकी प्रधानाध्यापक पम्फादेवी पुलामीले भवन अभावका कारण बाँसको टाटीले बारिएको अस्थायी कक्षामा पठनपाठन सञ्चालन गर्नुपर्ने अवस्था अन्त्य भएको बताइन् । नयाँ भवन बनेपछि शिक्षण–सिकाइ गतिविधि थप प्रभावकारी र व्यवस्थित बनेको उनको भनाइ छ ।
यसैबीच, कोशी प्रदेश सरकारको सात लाख रुपैयाँको लागतमा माङसेबुङ–४ स्थित सरस्वती आधारभूत विद्यालयमा चार कोठे आधुनिक शौचालय पनि निर्माण गरिएको छ । प्रधानाध्यापक दाताराम खनालका अनुसार यसअघि विद्यालयका भवनहरू फरक–फरक स्थानमा रहेका कारण शौचालय प्रयोग गर्न विशेषगरी साना कक्षाका विद्यार्थीलाई कठिनाइ हुने गरेको थियो ।
नयाँ शौचालय निर्माणपछि विद्यार्थीलाई सहज पहुँच भएको, सरसफाइ व्यवस्थापनमा सुधार आएको तथा विद्यालयलाई थप विद्यार्थीमैत्री बनाउन सहयोग पुगेको विद्यालय प्रशासनले जनाएको छ ।
रासस