असार १५, इलाम: भारतबाट इलामको माई नगरपालिका आएका २५ बर्षिय एक पुरुषलाई पिसिआर नेगेटिभ रिपोर्ट आएको भन्दै घर जान दिइयो । इलामको माई नगरापालिकाको क्वारेन्टाईनमा बसेका उनी खुसी हुदै शनिबार घर पुगे । तर आइतबार विहान उनलाई फोन आयो, तत्काल क्वारेन्टाइनमा आउनु भनेर । क्वारेन्टाइनमा पुग्दा उनी कोरोना भाईरस संक्रमित भएको बताईयो । इलामका प्रमुख जिल्ला अधिकारी र माई नगरपालिकाका प्रमुख दिपक थेवेको समन्वयमा उनलाई हाल गोठगाउँमा रहेको आइसोलेसनमा लगि उपचार शुरु गरिएको छ ।
संक्रमित निज व्यक्तिले क्वारेन्टाइनबाट घर गएपछि कोको सँग भेटे भन्ने विषयमा कन्ट्याक्ट टे«सिङ भईरहेको प्रशासनले जनाएको छ । इलामका प्रमुख जिल्ला अधिकारी सेढाईले समुदायस्तरमा संक्रमण फैलन नदिन यथासक्य प्रयास भईरहेको जानकारी दिए । यस्तो घटना कसरी भयो भनेर इलामका प्रमुख जिल्ला अधिकारी तुलसीराम सेडाईले माई नगरपालिकाका प्रमुख दिपक थेवेसँग बुझ्दा थेवेले कोशी अञ्चल अस्पतालले गल्तीपूर्वक शनिबार उनको रिपोर्ट नेगेटिभ पठाएको र आइतवार उनकै रिपोर्ट पोजेटिभ पठाएको बताए । तर यथार्थ भने अलग छ । माई नगरपालिकाका प्रमुख दिपक थेवेले प्रमुख जिल्ला अधिकारीलाई झुट बोलेको खुलेको छ । शनिबारको दिन आएको रिपोर्टमा निज २५ बर्षिय पुरुष संक्रमित बाहेक अन्यको मात्र कोशी अञ्चल अस्पतालले रिपोर्ट सम्बन्धित निकायलाई पठाएको थियो भने आइतबारको रिपोर्टमा मात्र निज संक्रमित पोजेटिभ भएको रिपोर्ट कोशी अञ्चल अस्पतालले सम्बन्धित निकायलाई पठाएको पाइएको छ । इलाम अस्पतालका प्रमुख डा. प्रभु शाहले हामीलाई रिपोर्ट देखाउदै भने, ‘कोशीको गल्ती कहि पनि भएको छैन ।’
