इलाम, २० जेठः जातीय भेदभाव तथा छुवाछुत उन्मुलन दिवस इलाम लगायत देशभर भोलि जेठ २१ गते मनाईदैछ । वि.सं.२०६३ साल जेठ २१ गते नेपाल सरकारले नेपाललाई जातीय छुवाछूत मुक्त राष्ट्र घोषणा गरेको थियो । त्यसै दिनको सम्झनामा वि.सं.२०६८ सालदेखि हरेक वर्ष जेठ २१ गतेलाई जातीय भेदभाव तथा छुवाछूत उन्मूलन दिवसका रुपमा मनाउने घोषणा गरेको हो । तर इलामका अधिकारकर्मीहरुले भने यस पटक यो दिवसलाई श्रद्धाञ्जली सभा गरेर मनाउने भएका छन् । पश्चिम रुकुमको चौरजहारी नगरपालिकामा दलित युवा लगायत अन्य युवाहरुको सामुहिक रुपमा भएको हत्याको विरोध तथा उनीहरुको सम्झनामा श्रद्धाञ्जली कार्यक्रम गर्ने तय भएको इलामका दलित अधिकारकर्मी नवराज शंकरले ग्रीन इलामलाई जानकारी दिएका छन् ।
मंगलबार बिहान बसेको विभिन्न अधिकारकर्मी संघ संस्थाहरुको भेलाले भर्खरै चौरजहारीमा मृत्युवरण गरेका युवाहरु तथा नेपालमा जातीय भेदभाव तथा छुवाछुत उन्मुलन दिवस मनाउन थाले देखि आजको मिति सम्म सामाजिक विभेदकाका कारण हत्या गरिएकाहरुको सम्झनामा मनाईन लागेको श्रद्धाञ्जली सभामा इलामका राजनैतिक दलका प्रतिनिधि तथा प्रमुख जिल्ला अधिकारी लगायत अन्य सरोकारवालाहरुको दिनानुदिन बढ्दै गईरहेको जातीय विभेदको बारे आआफ्नो धारणा राख्नका लागि अनुरोध गर्ने समेत निणर्य भएको अर्का इलामका अग्रज दलित अधिकारकर्मी डम्बर गदालले जानकारी दिएका छन् । उक्त कार्यक्रम भोलि बुधबार अपरान्ह १ बजे सदरमुकामस्थित ठुलो टुँडिखेलबाट र्याली शुरु भई चोकबजारमा पुगेर सभा आयोजना गरिने बताईएको छ ।
