असार ३, इलाम : इलाम अस्पतालमा ३ थान डाइलोसिस मेसिन ल्याउन इलाम नगरपालिका र रोटरी क्लब अफ धरानविच सम्झौता भएको छ । जिल्ला समन्वय समिति इलामका प्रमुख गणेश बराल र इलामेली समाज प्रदेश १ का अध्यक्ष रोटरियन कृष्ण शाहको उपस्थितिमा गरिएको सम्झौता पत्रमा इलाम नगरपालिकाको तर्फबाट नगर प्रमुख महेश बस्नेत, इलाम अस्पतालको तर्फबाट मेडिकल सुपरिटेन्डेन्ट डा प्रभु शाह र रोटरी क्लब अफ धरानका अध्यक्ष रोटरियन रविन श्रेष्ठले हस्ताक्षर गरे ।
जिल्ला समन्वय समिति इलाम र इलाम नगरपालिकाको अनुरोधलाई स्विकार्दै ती मेसिनहरु इलाम अस्पतालमा ल्याउन रोटरी क्लब अफ धरानले सहयोग गर्ने निर्णय भएबमोजिम सम्झौता सम्पन्न भएको हो । इलाम नगरपालिका ले ३ वटा डाइलोसिस मेसिन करिब ६० लाखमा १५ लाख समपुरक अनुदान रकम दिने सम्झौता गरेको हो । इलाम नगरपालिकाको कार्यालयमा सम्पन्न सम्झौता कार्यक्रममा इलाम नगरपालिकाकी उपप्रमुख सुशिला नेङ्वाङ, वडाअध्यक्ष होम बस्नेत, कार्यपालिका सदस्य सानु दास, कार्यकारी प्रमुख कालीप्रसाद भुजेल, प्रशाशकीय अधिकृत रामकुमार शाह, स्वास्थ्य शाखा प्रमुख रमन्ता पौडेल, अस्पताल बिकास समिति सदस्य नरेन्द्र खड्का, करुना फाउन्डेसनका प्रबन्धक अजित तामाङ लगायतको उपस्थिति रहेको थियो ।
सम्झौता सम्पन्न भएपछि खुसी व्यक्त गर्दै नगर प्रमुख महेश वस्नेतले इलामको स्वास्थ्यको क्षेत्रमा यस सम्झौताले ठूलो सहयोग पुगेको प्रतिक्रिया दिए । उनले भने, ‘अब डेढ दुई महिनाभित्र इलाममा डाइलोसिस सेवा शुरु हुन्छ ।’
