इलाम, २२ साउनः शनिबार पूर्वी नेपालका चार जिल्लासहितका क्षेत्रमा १२ घण्टा विद्युत् आपूर्ति बन्द हुने भएको छ । झापा, इलाम, पाँचथर र ताप्लेजुङ जिल्लाका सम्पूर्ण क्षेत्र तथा मोरङको उर्लाबारी, पथरी र आसपासका क्षेत्रमा विद्युत् आपूर्ति प्रभावित हुने भएको हो ।
नेपाल विद्युत् प्राधिकरणले मोरङस्थित केरौन १३२र३३ केभी सबस्टेशनको उपकरण परीक्षण तथा सञ्चालन र दुहबी–दमक १३२ केभी प्रसारण लाइन निर्माण कार्यका कारण विद्युत् आपूर्ति अस्थायी रुपमा बन्द गर्न लागेको हो ।
प्राधिकरणका अनुसार साउन २३ गते शनिबार बिहान ४ बजेदेखि दिउँसो ४ बजेसम्म विद्युत् सेवा अवरुद्ध हुनेछ । यस अवधिमा केरौनस्थित टावर नम्बर ६८ र ६९ बीच डेड–एन्ड टावर जडान गर्ने काम पनि सम्पन्न गरिनेछ । विद्युत् अवरोधका कारण झापा, इलाम, पाँचथर र ताप्लेजुङ जिल्लाका सम्पूर्ण क्षेत्र तथा मोरङको उर्लाबारी, पथरी र आसपासका क्षेत्रमा विद्युत् आपूर्ति प्रभावित हुने प्राधिकरणले जनाएको छ । प्राधिकरणले प्राविधिक कार्य सम्पन्न भएलगत्तै विद्युत् सेवा पुनस् सञ्चालन गरिने जानकारी दिएको छ । निर्धारित समयभन्दा अगावै काम सकिएमा सोहीअनुसार विद्युत् आपूर्ति पनि समयअघि नै सुचारु गरिने जनाइएको छ ।
विद्युत् अवरोधबाट सेवाग्राहीलाई पर्न जाने असुविधाप्रति प्राधिकरणले क्षमायाचना गर्दै सहयोग र समझदारीका लागि आग्रह गरेको छ ।
