इलाम, ९ साउन ः कोरना भाइरसको संक्रमण र लकडाउनको कारण शिथिल बनेको इलामको पर्यटन क्षेत्र र यहाँका व्यवसायीहरुलाइ सहयोग पुर्याउने उद्देश्य अनुरुप इलामको पर्यटन प्रवर्धन गर्न इलाम पर्यटन प्रर्वधन तथा सरोकार समिति र इलाम नगर पर्यटन समितिले नेपाल टेलिभिजन (एनटिभी) प्लसको रमाईलो यात्रा कार्यक्रमसँग सहकार्य गर्ने भएको छ । इलाम जिल्ला र नगरको पर्यटनसँग सरोकार राख्ने दुई संस्थाहरुले शुक्रबार संयुक्त रुपमा बसेको बैठकले उक्त निणर्य गरेको हो । एनटिभी प्लसका कार्यक्रम निर्देशक तथा प्रस्तोता रविन श्री सहित क्यामरा पर्सन संजय खड्का, अनुसन्धान मिडियाकर्मी खगेन्द्र खरो तथा पुस्कर र युवा उद्यमी सुनिल खतिवडा साउन १० गते इलाम आउँदैछन् ।
इलाम सदरमुकाम र सन्दकपुर गाउँपालिका रहेका पर्यटकिय क्षेत्रहरुको संगालोको वित्तचित्र तथा कार्यक्रम बनाउने सिलसिलामा साउन १० गते शनिबार नेपालकै पुरानो चिया कारखाना तथा बगान क्षेत्र, हालसालै उद्घाटित अरनिको संग्राहलय, चियाबारी परिसरको मूर्ति स्थापना गरिएको क्षेत्र हुदै भालुढुंगा पुग्ने सरकोकार समितिका सदस्य देवेन्द्र शंकरले ग्रीन इलामलाई जानकारी दिएका छन् । सोही टोली भालुढुंगाबाट भ्यू टावर हुँदै माईस्थान मन्दिर क्षेत्रको जानकारीमूलक दृष्यहरु समेटने छन भने साउन ११ गते बिहान सेतिदेवी मन्दिर, बालनगाउँ होमस्टे हुँदै रक क्लाम्बिङ र सुकिलुम्बा पार्क जाने कार्यक्रम तय भएको जनाईएको छ । त्यस्तै साउन १२ गते जस्बीरे, माईपोखरी, टोड्के झर्ना, नेपालटारस्थित सांग्रीला चिया कारखाना, दिदीबहिनी झर्ना, रत्नकुमार वान्तवा पोलिटेक्निकल इन्स्टिच्युट, रत्न सुरुङ, पानीटार लगायतको क्षेत्रमा भ्रमण गर्ने कार्यक्रम रहेको छ । यसका अलावा इलामका उद्यमीहरु, होटल, अन्य सरोकारवाला निकायहरुसँग साक्षात्कार कार्यक्रम समेत आयोजना गरिने इलाम नगर पर्यटन समितिकी कार्यवहाक अध्यक्ष सुसिला सापकोटाले जनाएकी छिन् ।
