बाईक र सिसी क्यामेरा तोडफोड गर्ने पारुहाङ र आकाशलाई सार्वजनिक मुद्दा

असार ४, इलाम : रातको समयमा पार्किङ गरेर राखेका मोटरसाईकलहरु तोडफोड गर्नेहरुलाई सार्वजनिक मुद्दा दायर गरिएको छ । इलाम चोकबजार, मालापथ र टुडिखेल क्षेत्रमा पार्किङ गरी राखेको मोटरसाईकलहरुलाई मालापथ इलामका बर्ष १९ का पारुहाङ देवान र बर्ष १९ कै आकाश परियारले रातको समयमा तोडफोड गरेका थिए । उनीहरुले प्रहरीले सुरक्षाका लागि मालापथमा राखेको सिसी क्यामेरा समेत तोडफोड गरेका थिए । निजहरुलाई सिसीटिभीले कैद गरेको फुटेजको आधारमा असार ३० गते पक्राउ गरिएको थियो । उनीहरुले २९ गते राति तोडफोड गरेका थिए । प्रहरीले हाल उनीहरु लागुऔषध प्रयोगकर्ताको सम्पर्कमा रहेको हुनसक्ने कोणबाट अनुसन्धान समेत शुरु गरेको छ ।