असार १०, इलाम : इलामका राजकुमार मगर माइला भारतको खर्साङ/कस्र्याङ स्थित एक अस्पतालमा अलपत्र परेका छन् । बैसाख २३ गते अर्थात मे ५ तारिकदेखि उनी खर्साङको खार्साङ सबडिभिजनल हस्पिटलमा छन् । इलाम अस्पतालमा कार्यरत स्त्रीरोग विशेषज्ञ डाक्टर रक्षा पराजुलीलाई भारतवाट जानकारी आएपछि माइलाको अवस्थाबारे ग्रीन इलामलाई जानकारी प्राप्त भएको हो । आफ्नो विषयमा खुलेर बताउन नसक्ने अवस्थामा रहेका माइलाले आफ्नो घर इलाम भएको बताउदै आएका छन् । उनलाई आफ्नो बुवा आमाको नाम समेत याद छैन । दार्जिलिङ जिल्लाको नक्सलमा रहेको हातीघिसा सिभिल डिफेन्स क्वारेन्टाइनमा उनलाई २०७७ बैसाख ४ देखि बैसाख २१ गतेसम्म राखिएको थियो । हाल उनलाई उद्धारको खाँचो छ । माइलाले हाल इलामको नामसालिङको नाम लिएकोले उनको घर नामसालिङ हुनसक्ने अनुमान गरिएको छ ।
