इलाम, २१ कार्तिकः आयुर्वेद सेवातर्फ नागरिकको आकर्षण बृद्धि भए पनि आयुर्वेद सेवालाई सरकारले उपेक्षा गर्दै आएको छ । आयुर्वेद उपचार सेवालाई इलाम जिल्लाका विभिन्न पालिकाहरुले उपेक्षा गरिएको गुनासो जिल्लामा आयोजित एक कार्यक्रममा गरिएको छ । सुर्योदय नगरपालिकाको आईतबारेमा रहेको जिल्ला आयुर्वेद स्वास्थ्य कार्यालय इलामले आईतबार आयोजना गरेको आयुर्वेद सेवा कार्यक्रम सम्बन्धि समन्वयात्मक समीक्षामा यो आवाज उठेको हो । आयुर्वेद उपचार पद्धतितर्फ आकर्षण बढ्दै गए पनि सेवा प्रभावकारी बनाउन जनशक्ति, उपकरण र औषधिको अभाव हुने गरेको सम्बन्धित क्षेत्रका स्वास्थ्यकर्मीले बताएका छन् ।
एलोप्याथिक क्षेत्रमा काम गर्ने सहकर्मीहरुले आयुर्वेद उपचार तथा औषधीलाई नगन्ने, हेयका दृष्टिले हेर्ने, पालिकामा बजेट विनियोजन गर्दा समेत गन्ती नगर्ने, जनप्रतिनिधिहरुले यसको महत्वलाई नुबझेको आयुर्वेद स्वास्थ्यकर्मीहरुको गुनासो रहेको थियो । समीक्षा कार्यक्रममा माई नगरपालिकाकी उपप्रमुख हिमा भण्डारी, सन्दकपुर गाउँपालिकाका उपाध्यक्ष हरी लुंगेलीले आगामी आर्थिक वर्षको बजेट विनियोजनमा आयुर्वेद औषधालयलाई पहिलो प्राथमिकता राख्ने बताउनु भयो । कार्यक्रममा इलाम नगरकी उपप्रमुख विष्णु दहाल लिम्बु, सुर्योदय नगरका उपप्रमुख दुर्गा बरालले आफ्ना नगरमा भईरहेको आयुर्वेद कार्यक्रमलाई निरन्तरता दिने बताउनु भयो । कार्यक्रममा प्रमुुख अतिथि जिल्ला समन्वय समिति इलामका प्रमुख जयप्रकाश राईले राज्यले हरेक प्रकारका जनमुखी कार्यक्रमलाई आफ्ना नीति तथा कार्यक्रम समेट्न अनुरोध गर्नु भएको थियो ।
