इलाम, १८ साउनः इलाम जिल्ला तथा सदरमुकाममा दिन प्रतिदिन कोरोना संक्रमितहरुको संख्या बढ्दै गईरहेकोले मालपोत कार्यालय इलामबाट प्रवाह गरिने सबै प्रकारका बाहिरी सेवाहरु अर्को सूचना प्रकाशित नभए सम्मको लागि साउन १९ गते सोमबारबाट स्थगित गरेको जनाएको छ । जिल्ला संकट व्यवस्थापन केन्द्र, इलामको आज आईतबार बसेको बैठकले मालपोत कार्यालयबाट दैनिक रुपमा प्रवाह हुने सार्वजनिक सेवा संचालन गर्दा थप जोखिम हुन सक्ने मुल्याकंन गरि सेवा स्थपगत गरिएको कार्यालयद्धारा आईतबार जारी सूचनामा जनाएको छ ।
स्मरण रहोस इलाम सदरमुकाममा रहेको शसस्त्र प्रहरी बलको क्याम्प पनि मालपोत कार्यालयको सम्मुखमा रहेको छ । शनिबारसम्म उक्त क्याम्प र नजिकै रहेको अर्को क्याम्पमा गरी शसस्त्रका २७ जना कोरोना संक्रमित भईसकेका छन् । उनीहरुको बिराटनगर र गोठगाउँस्थित कोभिड अस्पतालमा उपचार भईरहेको छ । यता आजै इलाम उद्योग वाणिज्य संघले पनि एक साताको लागि व्यापार व्यवसाय बन्द गर्न अनुरोध समेत गरिसकेको छ ।
