जेठ १०, इलाम : इलाममा सहकारीको लुज नेटवर्क गठन भएको छ । आदर्श बहुउद्देश्यीय सहकारी संस्थाका अध्यक्ष महेश श्रेष्ठको संयोजकत्वमा लुज नेटवर्क गठन भएको हो । बजार क्षेत्र मानिएको इलाम नगरक्षेत्रको वडा नं.५, ६, ७ र ८ मा मुख्य कार्यालय सञ्चालन गरिरहेका सहकारीहरुको समस्या तत्काल समाधानका लागि सो नेटवर्क गठन गरिएको आयोजकले जनाएको छ ।
सामान्य अवस्थामा आइपरेका कानुनी, नीतिगत तथा व्यवहारीक सहकारीका जटिलताहरुलाई थाती राख्दै कोरोना भाइरसका कारण सृजित लकडाउनको समयमा आइपरेका सहकारी सञ्चालनका चुनौती र लकडाउन खुलेपछिका सम्भावित चुनौतीहरुका विषयमा आयोजित अन्र्तक्रिया कार्यक्रममा सो नेटवर्क गठन गरिएको थियो । आदर्श बहुउद्देश्यीय सहकारी संस्था लि. इलामले आयोजना गरेको कार्यक्रममा १० वटा सहकारीहरुको सहभागीता रहेको थियो । गठन गरिएको नेटवर्कले बचत फिर्ता, आकस्मिक कर्जा, कोरोना विमा, अन्तर सहकारी सहयोग, हर्जाना छुट र सदस्य राहतका सन्दर्भमा समान धारणा निर्माण गरेको कार्यक्रमका सहभागी कमल श्रेष्ठले बताए । अर्का सहभागी लिला थापाले लुज नेटवर्कले दैनिक आइपर्ने सहकारीका समस्या तत्कालै समाधान गर्न सकिने विश्वास व्यक्त गरे । नेटवर्कले इलाम नगरपालिकाको कोरोना राहत कोषमा आर्थिक सहयोग गर्ने समेत निर्णय गरेको छ । सहभागी सहकारीहरुले नेटवर्कको संयोजक आलोपालो रुपमा चयन गरिने जनाएको छ । कार्यक्रममा प्रगति साकोस, शताब्दी साकोस, सुनगाभा साकोस, हिमाल साकोस, नारी विकास साकोस, जागृति साकोस, नमुना कृषि सहकारी, सेतीदेवी बहुउद्देश्यीय सहकारी लगायतको उपस्थिति रहेको थियो ।
