बैसाख २६, इलाम : राहासल बाल अनाथालयका अध्यक्ष राजेन्द्र चौहान र उनकी श्रीमती सन्तोस कुमारी चौहानले इलामेली किचन र माई भगवती बृद्धआश्रमलाई सब्जी सहयोग गरेका हन् । अध्यक्ष चौहान दम्पतीले इलामेली किचनलाई ४० किलो बन्दाकोपी र बृद्धआश्रमलाई १०० किलो नै बन्दाकोपी सहयोग गरेका हुन् । हालको विसम परिस्थितिमा आफैले बारीमा फलाएको बन्दाकोपी सहयोग गरेको उनले बताए ।
चौहान दम्पतिले ग्रीन इलाम मार्फत उक्त सामाग्री सम्बन्धित संस्थाहरुलाई सहयोग गरेका हुन् । इलामका युवा व्यवसायीद्वय देवी पौडेल र सुमन श्रेष्ठको सक्रियतामा सञ्चालित इलामेली किचनले लकडाउनको समयमा समस्यामा परेकाहरुलाई निशुल्क निरन्तर खाना खुवाईरहेको छ । इलामेली किचनका एक सञ्चालनक सुमन श्रेष्ठलाई सामाग्री हस्तान्तरण गर्न खोज्दा उनले लिन नमानेको अध्यक्ष चौहानले बताए ।
अनाथालयका अध्यक्ष ज्युको सहयोग हामी कसरी लिनु भन्दै श्रेष्ठले आफ्नो कुरा नसुनेपछि ग्रीन इलाम मार्फत सहयोग गरेको उनले बताए । उनले भने, ‘सुमनजीले त बाल अनाथालयलाई हामीले नै सहयोग गर्नुपर्नेमा तपाईको सहयोग कसरी लिने भन्नुभयो । हाल बन्दाकोपी कै हकमा भने अनाथालयलाई पुग्नेगरि यथेष्ट फलाएको छु । फलेर बाँकी भएको नै सहयोग गरेको हो ।’ यो सहयोग बाल अनाथालयका अध्यक्षको ठुलो मन भएको अर्को प्रमाण भएको बृद्धाश्रमकी अध्यक्ष विष्णु दहाल लिम्बुले बताइन् । हाल बृद्धआश्रममा ३ पुरुष र १२ महिला बृद्धबृद्धा आश्रित छन् ।
